၅နှစ်ပြည့်မွေးနေ့မှာ ညိုညိုလေးဟာ ပုလဲတုဆွဲကြိုးလေးတစ်ကုံးကို လက်ဆောင်ရခဲ့ပါတယ်။ ဒီဆွဲကြိုးလေးကို ကြိုက်လွန်းလို့ သူ့မှာလက်ကမချနိုင်ပါဘူး။ ဘာအင်္ကျီပဲဝတ်ဝတ် သူကတော့ အဲဒီဆွဲကြိုးလေးကို လည်ပင်းမှာအမြဲဆွဲထားတတ်ပါတယ်။ ညဘက်အိပ်ရင်လည်း ဆွဲကြိုးလေးကို ခေါင်းအုံးဘေးမှာ ထားပြီးအိပ်ပါတယ်။ ၆နှစ်ပြည့်မွေးနေ့ရောက်တဲ့အထိ ဆွဲကြိုးလေးအပေါ် သူ့နှစ်သက်မှုက လျော့မသွားပဲ တိုးလို့သာလာပါတယ်။
‘‘မေမေ၊ ဒီနေ့သမီးကို ဘာလက်ဆောင်ပေးမှာလဲဟင်။’’ ညိုညိုလေးက သူ့အမေကို မေးလိုက်ပါတယ်။
မအေက ခါးလေးကိုင်းပြီး သူ့ရဲ့ချစ်စရာကောင်းတဲ့မျက်နှာလေးပေါ်မှာ နဖူးလေးအပ်လို့ ‘‘သမီးလေးရယ်၊ မေမေက သမီးလေးကို အရမ်းလှတဲ့ လက်ဆောင်လေးတစ်ခုပေးရမှာပေါ့။ ဒါပေမယ့် သမီးရဲ့ ပုလဲဆွဲကြိုးလေးနဲ့တော့ အလဲအလှယ်လုပ်မှရမယ်။’’
ဒါကိုလည်းကြားရော ညိုညိုလေးရဲ့ မျက်လုံးအိမ်ထဲမှာ တမုဟုတ်ချင်းပဲ မျက်ရည်လေးတွေဝေ့လာတာပေါ့။ ‘‘မဖြစ်ဘူး၊ မေမေရဲ့။ သမီးဒီဆွဲကြိုးလေးကို အရမ်းကြိုက်တာမေမေလည်းသိတာပဲ။ သမီး တခြားဟာနဲ့ အလဲအလှယ်လုပ်မယ်လေ၊ ရမလား။’’
‘‘မရဘူးကွယ်။’’ မအေရဲ့လေသံက အရမ်းနူုးညံ့ပေမယ့် ခိုင်မာပြတ်သားလှပါတယ်။
‘‘သမီးရဲ့ ဆင်ဖြူရုပ်ကလေး မေမေ့ကို ပေးမယ်လေ။ အဲဒါလေးက သမီးအရမ်းကြိုက်တဲ့ ကစားစရာလေး။ ဟို မင်းသမီးဂါဝန်လှလှလေးကိုလည်း မေ့မေ့ကိုပေးလို့ရတယ်.......’’ ညိုညိုလေးက ပူပန်စိတ်ကလေးနဲ့ ပြောနေရှာပါတယ်။
‘‘မရဘူးကွယ်၊ မေမေက သမီးရဲ့ ဆွဲကြိုးကိုပဲလိုချင်တာ။’’ မအေက ခေါင်းခါပြီး ထပ်ပြောလိုက်ပါတယ်။
ညိုညိုလေး အသံတိတ်သွားတယ်။ တောက်ပတဲ့ မျက်ရည်လုံးလေးတွေက မျက်နှာပေါ်မှာ တလုံးပြီးတလုံး လိမ့်ဆင်းလာပါတော့တယ်။ ခဏလောက် အသံတိတ်နေပြီးမှ နောက်ဆုံးမှာ ညိုညိုလေးက လည်ပင်းကပုလဲဆွဲကြိုးလေးကို ဖြည်းဖြည်းချင်း ဖြုတ်လိုက်ပြီးတော့ လက်လေးနှစ်ဖက်နဲ့ သူ့အမေကို ပေးလိုက်ပါတယ်။
‘‘သမီးလေး..ရော့၊ ဒါကမေမေ သမီးကို ပေးတဲ့ လက်ဆောင်။’’ မအေရဲ့ အသံက အနည်းငယ် ဆို့နင့်နေပါတယ်။
ညိုညိုလေးက ဖြေးဖြေးခြင်းခေါင်းမော့လိုက်ပါတယ်။ သူ့အငိုမျက်လုံးလေးထဲမှာ လှပသေသပ်တဲ့ ဗူးလေးတခု ပေါ်လာပါတယ်။ အထဲမှာတော့ ညက်ညောစင်ကြယ်ပြီး ပြိုင်ဘက်ကင်းအောင်လှတဲ့ ပုလဲဆွဲကြိုးလေးတစ်ကုံး။ ဒါကတော့ ပုလဲအစစ်ပါ။
လတ်စသတ်တော့ မအေက သမီးဖြစ်သူ ပုလဲတုဆွဲကြိုးလေးကို စွန့်လွှတ်ရဲတဲ့အချိန်အထိ တမင်စောင့်ပြီးတော့မှ ပုလဲအစစ်ဆွဲကြိုးလေးကို ပေးခဲ့တာကိုး။
|
-------------------------------------------------------------------------------------------------------------------------------
ဒီဘာသာပြန်ရဲ့ မူရင်းကတော့ SMALL STORY, BIG PRINCIPLE လို့ နာမည်ပေးထားတဲ့ 小故事,大道理 စာအုပ်ထဲကပါ။ ဒီပုံပြင်ရဲ့ မူရင်း ခေါင်းစဉ်ကတော့ 妞妞的项链 ဆိုတာပဲဖြစ်ပါတယ်။
ပျော်ရွှင်ကြပါစေ
ဦးမောင်
၁၈.၀၂.၂၀၁၀ ည ၁၀း၁၃
No comments:
Post a Comment