ဒီနေရာက ယဉ်ကျေးမှုနဲ့ စာပေ(အနုပညာ)လှုပ်ရှားမှု အလွန်မှနည်းပါးလှတဲ့ ခရိုင်မြို့လေးပါ။ မြို့သူမြို့သားတွေဟာ တခါလောက် ရုပ်ရှင်လာပြတယ်ဆိုရင်ကိုပဲ လ၀က်လောက်အထိ မြိန်ရည်ယှက်ရည်နဲ့ ပြောနေကြတုန်းပါ။ ဒါပေမယ့် တစ်နေ့မှာတော့ အားကစားအဖွဲ့တစ်ခုဟာ အားကစားပြပွဲတစ်ရပ်ကို မြို့လည်ကအားကစားကွင်းမှာ ဒီစနေ၊တနင်္ဂနွေ ကျင်းပမှာဖြစ်ကြောင်း ခရိုင်ဝန်က ကြေငြာလိုက်ပါတယ်။ ဒါဟာ အလွန်ကြီးကျယ်တဲ့ကိစ္စဆိုတာ သံသယဖြစ်စရာတောင်မလိုပါဘူး၊ တခရိုင်လုံးမှာ ချက်ချင်းပဲ ဂယက်ရိုက်သွားပါတော့တယ်။
ပြပွဲနေ့မှာ ပွဲမစခင် တစ်နာရီကျော်လောက်အလိုကတည်းက စိတ်လှုပ်ရှားတက်ကြွနေတဲ့ မြို့သူမြို့သားတွေဟာ အားကစားကွင်းလေးဘက်လေးလံမှာ လေတောင်တိုးမပေါက်နိုင်လောက်အောင် ၀ိုင်းကြီးပတ်လည်နဲ့ လူတံတိုင်းကြီး ဖြစ်နေပါတော့တယ်။
အဲဒီမှာ ကောင်လေးတစ်ယောက်ဟာ နောက်ကျမှရောက်လာတာ အထင်အရှားပါ။ လူတံတိုင်းကြီးရဲ့နောက်မှာရပ်ပြီး (ပွဲမကြည့်ရမှာ)ပူပန်နေတဲ့ပုံ မျက်နှာမှာ အထင်းသားပေါ်လွင်နေပါတယ်။ သူဟာ ဟိုဘက်တိုးကြည့်လိုက် ဒီဘက်ချောင်းကြည့်လိုက်လုပ်ပေမယ့် ဒီလူတံတိုင်းကြီးရဲ့အလယ်က မြင်ကွင်းကို ဘယ်လိုမှမမြင်ရပါဘူး။ ဘယ်လိုလုပ်ရင်ကောင်းမလဲပေါ့၊ သူခေါင်းကုတ်ပြီးစဉ်းစားတယ်။ ရုတ်တရက် မလှမ်းမကမ်းမှာ အုတ်ခဲပုံတစ်ပုံကို သူသွားတွေ့တယ်။ အဲဒီအခိုက်မှာပဲ စိတ်ထဲ အကြံရသွားတယ်။ အဲဒီလိုနဲ့ပဲ သူဟာ အုတ်ခဲတွေကို တစ်ခေါက်ပြီးတစ်ခေါက်သယ်ပြီး ထူထပ်နေတဲ့ လူတံတိုင်းကြီးရဲ့အနောက်မှာ သူ့ကိုယ်ပိုင်တံတိုင်းတစ်ခုကို တစ်လွှာပြီးတစ်လွှာ စီနေတော့တာပေါ့။ သူဟာ အချိန်ဘယ်လောက်ကြာအောင် (အုတ်ခဲတွေ)စီနေတယ်ဆိုတာကို မသိပါဘူး၊ အဲဒီအတွက်ကြောင့် ကောင်းပေ့ဆိုတဲ့ပြိုင်ပွဲတွေ ဘယ်လောက်တောင်လွတ်သွားတယ်ဆိုတာလဲ မသိဘူးပေါ့။ သူသိတာကတော့ ကိုယ်ကိုယ်တိုင်စီထားတဲ့အုတ်ခုံပေါ်ကို တက်လိုက်တဲ့အခါဖြစ်လာတဲ့ အောင်မြင်မှုပီတိ နဲ့ ကိုယ့်ကိုယ်ကိုဂုဏ်ယူမိတဲ့(စိတ်)ဟာ သူ့ရင်ဘတ်ထဲ ရုတ်ချည်း ပြည့်နှက်လာတာကိုပါပဲ။ မယုံရင်လည်း ကြည့်လိုက်ပါဦးလေ။ ကိုယ့်ဖာသာ ကျေနပ်နေတဲ့အပြုံးက သူမျက်နှာမှာ ရှင်းရှင်းလင်းလင်းကို မြင်နေရပါတယ်။
|
-------------------------------------------------------------------------------------------------------------------------------
ဒီဘာသာပြန်ရဲ့ မူရင်းကတော့ SMALL STORY, BIG PRINCIPLE လို့ နာမည်ပေးထားတဲ့ 小故事,大道理 စာအုပ်ထဲကပါ။ ဒီပုံပြင်ရဲ့ မူရင်း ခေါင်းစဉ်ကတော့ 观看比赛 ဆိုတာပဲဖြစ်ပါတယ်။
ပျော်ရွှင်ကြပါစေ...
မောင်မောင်
၀၃.၀၁.၂၀၁၀ ည ၁၀း၂၇
No comments:
Post a Comment